Salam Jo Sambah

Kapado niniak mamak yang gadang basa batuah, nan arih bijaksano,ka pai tampek batanyo, ka pulang tampek babarito. Hukumnyo adia, katonyo bana. lupo maingekan, kok takalok manjagokan. Nan bak umpamo kayo gadang di tangah koto. Pucuaknyo cewang ka langik. Urek nan buliah tampek baselo, batang gadang tampek basanda. Dahan kuek buliah bagantung, daun rimbun buliah balinduang. Tampek balinduang kapanehan, tampek bataduah kahujanan. ayia janiah buliah diminum, buah labek dapek dimakan.

Kok mauji samo sirah, manimbang samo barek, maukua samo panjang, mambilai samo laweh, mambagi samo adia, baragiah samo banyak. Timbangan nan adia, bungka bagatok, taraju nan piawai. Kusuik ka manyalasai, karuah mampajaniah. Tibo di mato indak dipiciangan, tibo di paruik indak dikampihan, tibo di dado indak dibusuangan.
"Sambah sujuik sambah tasimpuah , sabarek bungka nan piawai, indak basibak jo basisie, bukan bahinggo jobabateh.ampunkan juo diri ambo..

Kaampek suku dinagari, nan manjunjuang sako adat, bilal, maulana jo tuangku, nan tahu dihalal jo nan haram, sarato sah jo nan batua, suluah dendang adat limbago.
Hulu balang jo ampang limo, jo manti pagawai adat, nan bak umpamo pagaran kokoh.
Cadiak jo tahu pandai, nan arief bijaksano, tahu diangin nan basuruik, tahu diombak nan basambuang, sarato dahan kamaimpok, runciang kamancucuak, tahu dialamaik kato sampai, alun bakilek lah bakalam, takilek ikan dalam aiei, ikan takilek jalo tibo, tantu jantan batinonyo."Sambah sujuik sambah tasimpuah , sabarek bungka nan piawai, indak basibak jo basisie, bukan bahinggo jobabateh."rilah jo maaf hambo pintak...


Nan mudo pambimbiang dunie, nan capek kaki ringan tangan, capek kaki indak panaruang, capek tangan indak mamacah, aso tarantang duo sudah, nan bahati suci bamungko janieh, nan tahu dimalu jo sopan, sarato raso jo pareso, ancang ancang dalam nagari. Sarato kapado bundo kanduang, limpapeh rumah nan gadang, sumarak dalam nagari hiasan dalam kampuang, nan gadang basa batuah, kaundang-undang ka Madinah, kapayuang panji kasarugo.rilah jo maaf hambo pintak.


Sarato jo urang banyak, nan tidak baimbau namo sarato basabuik gala, nan dilingkuang barieh jo balabeh, didalam cupak jo gantang, dikanduang adat jo pusako. Ujuik tujuan buah rundiang, sakiro paham dikahandaki, bahubung jo maso nan ditampuah, musim nan tumbuah iko kini, syariatnyo ado bahakikat, Lahieh kulik manganduang isi. Lahieh manjadi buah ama, dek enggeran sako nan tatagak, Koto aman alam santoso, salamaik korong jo kampuang, nak aman anak kamanakan. Dunia buliah akhirat dapek, sinan mardeko mangkonyo panuah. curai jo paparan, bukan mahunjuak maajari. rilah jo maaf hambo pintak.

Dek rang mudo nan jolong gadang, Aka balun pandapek kurang, Pangalaman jauh sakali. Koksalah tolong tunjuak kan, Kok karuah tolong janiah kan, kok anyuik tolong pinteh kan, Buliah nan kalam nak nyo tarang,